التونسيون و الفيسبوك

موضوع للنقاش

لمناقشة هذا الموضوع أقترح عليكم أن ننتلق من هذا النص
الذي كيبه أحدهم
تقييما لسلوكيا التونسيين على الفيسبوك



بصراحة الفايسبوك اعطى نفس وجرعة كبيرة من الحرية لكل الشباب التونسي وحتى الاعلام التونسي اصبح يتاثر مع معظم ما ينشر على الفايسبوك ولكنه لا يطرح كل المواضيع بالطبع...احنا توة في مرحلة انتقالية هامة برشة الا وهي الانتقال الى مرحلة حرية تعبير حقيقية بالفم والملا...المشكل الوحيد اللي ديما تلقى برشة حساسيات في المواضيع السياسية والدينية والكروية كي لا اقول الرياضية...بالنسبة للمواضيع السياسية فالشباب التونسي ينقسم الى 3 اجزاء جزء مساند للسلطة و مؤمن بمبادئ وقيم و توجهات الدولة التونسية و جزء ثاني دائم النقد والتهكم والسخرية من كل قرارات الدولة وسياساتها اما الجزء الثالث فهو الجزء متاع "خاطيني" يحكيلك في كل شيئ الا في السياسة والعباد هاذم يفضلو يحتفظو برايهم لنفسهم خاطرهم يخافو من مثل هذه الحوارات المرعبة في نظرهم واللي ممكن تجيبلهم مشاكل في صورة ما ادلاو برايهم وكيف نجيو نشوفو نلقاو في معظم الاحيان عرك ومعروك بين الجزء الموالي لسياسة الدولة والقسم المعارض لها وساعات الامور تاكل بعضها بين الاثنين وتصير اتهامات كيما يا قفاف ويا خائن ويا بيوع ويا خوانجي الخ...بالنسبة للمواضيع الدينية تصير فيها اقل مشاكل كيف يبداو الناس الكل مجمعين في الراي على نفس الموضوع اما كيف يتحط فيديو تابع ل"الفة يوسف" مثلا والا "منجية السواحلي" والا الشيخ "محمد حسان" هكة ينقسم الشباب التونسي الى قسمين القسم الاول مسلمين اما يامنو بالفكر العلماني و مبدء الوسطية في الاسلام وهم مساندون للفكر البورقيبي الذي تعاطى مع مبدء الوسطية في الاسلام على طريقته الخاصة اللي اثارت برشة جدل بين التوانسة ما بين معارض وما بين مساند الخ اما القسم الثاني هوما توانسة مسلمين حد النخاع و لا يقبلون اي شيئ يخالف شرع الله كل شيئ الا الدين الاسلامي اللعب معاه لا و قداش من مرة نلقاو برشة مشاكل بين هالزوز اقسام واول الاتهامات اللي نشوفوها هي يا خوانجي او يا كافر الخ...بالنسبة للرياضة عموما ما نلقاو فيها حتى مشكل اما المشاكل الكبيرة اللي نلقاوها ما تكون كان في رياضة كرة القدم و 4 الفرق الكبار متاع تونس.هنا تنعدم الاخلاق وما تسمع كان وسخ وذنيك وما نشوفو كان السب والشتم والجهويات بين الشباب التونسي وكل انسان تلقاه يدافع على جمعيتو اكثر ماللي يدافع على امو والا اختو وقليل وين نلقاو شاب تونسي يهني الفريق الخصم بالفوز الخ
معظم الشباب التونسي لا يقبل الاستفزاز وردة فعله دائما ما تكون عنيفة لتتحول الى كلام بذيئ ومخالف وهو في المجمل يكون متعصب لرئيه الشخصي وما يحبش شكون يعاندو فيه وهذا ما ينفيش اللي فمة بعض الشباب غاية في الادب والاحترام و التربية وينجم يقنعك بفكرتو من غير ما يفرض عليك رايو...ملخص حديثي اللي الشباب التونسي في المجمل المعدن متاعو طيب اما الله غالب الزمان هذا فسدت فيه الاخلاق وحتى عقاب حوار نظيف ما نجموش نتحاوروه بين بعضنا بالسياسة الا ما نغششو بعضنا ونسبو بعضنا و نتهمو بعضنا اما في المجمل انا نشوف اللي احنا قاعدين نتقدمو في مجال حرية التعبير وبما انو الفايسبوك حل علينا باب كبير متاع حرية ما كناش موالفين عليها بالطبيعة لازم باش توقع العديد من الصدامات بين الافكار والاراء والقيم والمبادئ...في الاخير انا نقول ان شاء الله يجي النهار اللي نشوفو فيه كل الشباب التونسي يعبر على رايو بكل حرية وكل الاطراف تقبل الاراء المخالفة لها من غير سب وشتم واتهامات باطلة وتكفير للاخر وو تخوين له انا على يقين اللى من هنا ل5 سنوات قادمة باش تتغير برشة حاجات في مجال حرية التعبير و الراي وكل هذا يعود اولا واخيرا بالطبيعة لسي وخينا الفايسبوك لوول